الهجال المهد نيوز



المتواجدون الآن


تغذيات RSS

الأخبار
اخبار القبيلة
على بن خلف الهجلة لقاء خاص بصحيفة الهجال
على بن خلف الهجلة لقاء خاص بصحيفة الهجال
على بن خلف الهجلة لقاء خاص  بصحيفة الهجال
الجزء الثاني من لقاء الشاعر على بن خلف الهجله
02-23-2011 10:24
خاص بصحيفة الهجال - تنسيق اللقاء "عبدالهادي زياد" -حوار(حصااان مطير- ألف معنى):
بعد ان تم طرح
الجزء الاول من لقاء الشاعر على بن خلف الهجله
نستكمل معكم بقية اللقاء

شعري راح بدون تصوير في الوقت الاول
محمد بن متروك سهم مارق
لو كانت فيه محاورة ربعاية وقبلانا اهل معنى واهل اصليه لاخذت سوار الذهب الى جنبي

image

طيب يا ابو فيصل قصيدة لم تظهر للاعلام بعد؟
ربعي ياربعي عودوا لاتضيقون=صفوا سوى وانسو جميع الخطايا
اكيد انا اخطي وانتم احيان تخطون=ولا الله عصم الا نبي البرايا
وانا عفيت ولازم الربع يعفون=قدام لاتسبق علينا المنايا
فتشت ادور وان ماعندكم لون=ولا لقيت الا جلظي وحمايا
اشوفكم تجمعون وتخالون=ومع كل ريع تشعبون المطايا
ويش السبب حتى عليه تهارون=ولاباقي الا تقطعوني شوايا
انا ماني فالعد ياللي تعدون= والجد الاول الاول ماذخرلي وصايا
ان كان ماني في العدد ماتلامون=واللوم عنكم في بعيد الندايا
وان كان عدي عدكم وش تقلون=ماهي غوايه من كبار الغوايا
وان كان حرشة من عدو كيف ترضون=وتفرحون اللي علينا طنايا
المبغضين الحاسدين يتعادون=ونيرانهم تشعم بكل الزوايا
وليا عرفتوا كيدهم وش تحرون=اسرع سهوم الموت سم الحيايا
تراي ما استاهل هذا اللي تسوون=لاني ردي ولا خبيث النوايا
لكن في العلم الردي لاتمادون=ولاتزيدون الوهايا وهايا
انا لكم اكبر فخر لو تعرفون=ومن دونكم والله مسوي سوايا
اسعى وادور عزكم حيث مايكون=واهوش واستحمل جميع البلايا
قلبي لحب المجد مغرم ومفتون=حب الفخر ماهو بحب الصبايا
واللي حوالينا من الناس يدرون=تعلموا عني نزول القرايا
ولا فيه علم خافي انتم تشوفون=شهودي انتم في جميع القضايا
والله ماني مثل ما انتم تضنون=انا بعيد عن صفات الدنايا
لا ارخص مكانتكم ولااحطكم دون=ولا املى البطن بالزاد وانتم قوايا
ولا اشعر براحة نفس وانت تعانون=ولا البس ثياب جداد وانتم عرايا
لكنكم تكفون تكفون تفكون=انسوا خطايه وانظروا للمزايا
وحطوا يداكم في يدي قبل تفنون=مادام باقي للقبيلة بقايا
لعلنا نرجع مثل ما انتم تخبرون=ونمسح عن الصورة اثار الشضايا
ونخلي اللي يضحكون يتباكون=ونصك باب الغطرسة والزرايا

قصيدة اخرى يا ابو فيصل؟
وصلت هذا الكون ما املك ولاقرش=جابتني امي مامعي لو ثوبي 
نزلت فوق الارض ماني على فرش=واخذت لي ساعة صياحي طنوبي
واضفى عليه نعمة السامك العرش =سهل مطاليبي وسهل دروبي
وخلاني انبت مثل ماينبت الورش=حتى قدرت اقوم واسد نوبي
وخلالي الارزاق طول الدهر شرش=امشي على كيفي شمال وجنوبي
واجمع من الارزاق واحط في الكرش=والزود المه وادحسه في جيوبي
قلبي يذل من الفقر خارشه خرش=نسيت حالي مع هلي يوم جوبي
لو كان لي ضينن ومعزى ولي طرش=قلت الفقر عانوه جاني يحوبي
قالو تصبر واحتسب قلت ما اقدرش=نقصة رصيدي من كبار العيوبي

وهي حالة عامة مع الناس كلهم كل واحدي يبي رصيده فوق


image

طيب نبي ابيات غزلية يا ابو فيصل؟
غزل لاتحاول الا في نسواني ما اقدر اعلمك به

اين ابو فيصل من الساحة الان لانرى لك ظهور ؟
والله انا العب الى الان . انا اول كان حابسني عملي وصرت ما اطلع الا الخميس والجمعة واحوم في محيط المدينة وليا تبحبحت وصلت جده والا ينبع.
مرة او مرتين اخذوني للكويت , وشعري راح بدون تصوير في الوقت الاول مع صياف و معيض العجي والثبيتي ومجموعة اخرى.
لكن بعد احالوني للتقاعد عود ماعاد فيني فايده لياجتني ثلاث عزايم اخذت وحدة وتركت ثنتين في الشهر الواحد. واقعد بعدها يومين تعبان.

هل يحضر علي بلفوس والا بدون ؟
يضحك.....لا مايحضر الا بفلوس طبيعة قشرى


طيب لجنة شعراء المعنى ؟
ممتازين ومن الشعراء اللي اخذين مكانتهم كاملة

سمعنا انك دعيت لتكون من ضمن لجنة التحكيم في شاعر المعنى؟
سمعت كلام كثير من الناس لكن دعوة موجهه لي لم تاتيني . لو اتتني استحي اني ارفضها مره.
ولكن فعلا سمعت جاء فيه مجال كثير , لكن الثلاثة اللي انتقوهم بمافيهم فيصل الله يغفر له تراهم نقوه في فهم دسائس الشعر .


في النسخة الثانية اضافوا محمد بن متروك .
محمد بن متروك سهم مارق


هناك من يقول ان زيد العضيلة الان هو من يمثل قبيلة مطير والبعض يرى تركي الميزاني والبعض يرى سوار الذهب عبداللع الميزاني . انت من ترى منهم؟
انا ارهم كلهم شعراء وكل واحد فيهم له ميزه خاصة فيه دون الاخر .


لو كان هناك محاورة رباعية مع شعراء من خارج القبيلة وكان الثلاثة متواجدين من تختار منهم لكي يلعب معك؟
اذا كان اللي مقابلني مهاوشي انا اخذ تركي .
واذا كان قبلانا اللي يلاعبونا اهل معنى واهل اصليه مثل سليم وهذيل انا اخذ عبدالله
وان كان قبلانا من نجد من حايل الى الطائف فانا اخذ زيد رجال وسيع وبيته كامل من جميع الاوصاف والعقل فيه يغلب الحماسة


يقال ان زيد يجامل خصمة اكثر من اللازم؟
لازم يجامل اللي مايجامل ماهو ادمي يارجال, وهذا كلام الجمهور ولايدرون الشاعر وش يقول زيد شاعر وملم ولو يضحك لك تراه يكويك .


محاورة لعلي لاتنسى
محاورة بيني وبين رشيد الزلامي اتذكر منها حروف وكانت قوية بالحيل, ورد فعلها مع الجمهور قوي
يقول من ضمن حروفه:
انت حطوك في التعليم ثم ابتليته=ماتقاعد كما ام الضبي دايم ثنيه
قلت:
انت لو جيت في التعليم خربت بيته=كل يوم يسجل في ملفك قضية 
هذه لقطة من المحاورة ولاني حافظها


كانت لك تجربة اعلامية وتوقفت؟
نعم عشرين سنه وانا اقدم برنامج مضارب البادية من تلفزيون المدينه المنورة . طبعا انت تعرف ان البادية توقفت في تلفزيونات المملكة مع ظهور القنوات ولاعاد لها حاجة.
والسبب الوحيد في توقف البرنامج هو ظهور القنوات .

كيف ترى ساحة المحاورة الان ؟
اراها ممتازه وفيها بضاعة كل الناس .
اللي يبي المعنى يجد شعراء المعنى واللي نظره للطرب يجد شعراء الطرب ارى انها اتية بجميع الاغراض .


من هم شعراء المععنى من جيل الشباب؟
والله ما اقدر احصيهم ولكن يعجبني العطياني وصل ويعجبني راشد السحيمي لو انه مايعتبر من الشباب.
الشاب الصغير المعنى عنده مايضبط ولكن تشوف فيه لمسات من المعنى ماهو خالي, وكذلك الدغيلبي.


طيب من شعراء مطير الشباب
ما اقدر اعدهم لك انا مطلع منهم امس عشرة شعراء ابي اقول لك العشرة شعرا معنى.


شعراء الهجال المشاركين في شعراؤنا لم يتاهل منهم الا نمر!! لماذا؟
بعظهم ردوه لانه كبير في السن وهم مشترطين ان لايتجاوز الاربعين اللي هم القطافي وابن عواضة والباقين ماننجح احد هو ينجح نفسه ومجهوداته تنجحه.

image

كلمة للداعم لشعراؤنا لانه شخص يستحق الشكر.
عبدالرزاق الحمياني هبة وهبا االله لمطير هذا الرجل اللذي لايبخل بماله ولابوقته ومجهوداته وايضا افكاره اذا اضفتها مع افكار سعود البديري تطلع بمشروع متكامل
افاد القبيلة وعمل عمل ماعملوه الرأسماليين .


ماذا قدمت البرامج الشعرية للشعر؟
البرامج الشعرية اكبر حافز للشعراء الشباب . خاصة بالذات اذا شافوا برامج اعجبهم كذا قاموا يحاكونه.


ماهو اذن افضل برنامج شعري تراه الان؟
والله انا متابعتي لها قليلة. ولكن اللي اجريت في المملكة وخاصة شاعر المعنى والله انا اشوفه انه دفع الشعر دفعة قوية جدا جدا واظهر شعراء ماكنا نعرفهم ووجدنا عندهم البضاعة المدورة .



يعني تنصح الشباب بالمشاركة في تلك البرامج ؟
اقول لا يتاخر منهم احد . الا واحد الحظ ما ساعدة .
واتمنى ان اللي يشارك يكون جيد.
المبتدئ يتدرب في الساحة وفي المديان والحفلات الاهلية وبعدين ينتقل لها لانه يبي يتحطم اذا جاء للمسابقة وهو لم يتمكن يمكن ينظر.

كلمتين يا ابو فيصل للاسماء التالية:
محمد سعد الهجله
قمة شعراء النظم في قبيلة مطير. انا كيد قلت له شخصيا . قلت لو يسمح النظام باقامة نصب تذكاري لكل قبيلة حطيت نصب ونحتنا عليه محمد سعد الهجله.
لانه ابرز كل خفايا القبيلة اللي ترفع قيمتها بين القبائل.


محمد معيض
شاعر محاورة وفيه الثقل شوي وهو شاعر وانا متالم اشد الالم يوم ماحالفه الحظ في شاعر المعنى .

نمر منيع
نمر شاعر وظفر وحماسي ومغوار وانا ارى الى الان على بيوته انها تحتاج تركيز اكثر


مشعل دخيل الله
مشعل شاعر يكررها مشعل شاعر ولايحتاج يدخل حتى المسابقات

سلطان حاجي مع انني لم اره في الوقت القريب
سلطان حاجي شفته مرتين او ثلاث شعره حلو وجيد ومستغرب اني ماشفته في المسابقات



شكرا لك يا ابو فيصل لاتاحة الفرصة لنا وبيض الله وجهك
شكرا لكم ووجيهكم بيض


image

تعليقات 5 | إهداء 0 | زيارات2329


خدمات المحتوى
  • مواقع النشر :
  • أضف محتوى في Digg
  • أضف محتوى في del.icio.us
  • أضف محتوى في StumbleUpon
  • أضف محتوى في Google
  • أضف محتوى في facebook



التعليقات
#28 Saudi Arabia [عوض عياد الهجله]
1.01/5 (31 صوت)

02-24-2011 12:22
الله يعطيكم الف عافيه ولاهنتم على اللقاء الجميل مع الشاعر والأعلامي / علي خلف الهجله

شخص مثير جدا يعطي رأيه بصراحه .. يعجبني في فتله ونقضه في المحاورات

أنا من أشد المعجبين لشخصيته وأعرف أنه رجل متعلم ومثقف وله ثقله عند لقاء اهل القمة العالية من القبائل

بارك الله فيه وأطال في عمره ....


#29 Saudi Arabia [روووح]
1.01/5 (31 صوت)

02-24-2011 12:58
الله يعطيك العافيه ياابوعادل..
بيض الله وجهك على هاللقاء الرائع..
ولاهوبغريب على شرواك..
اناهنابأنتظارجديدك..


#30 Saudi Arabia [سهام]
1.01/5 (32 صوت)

02-24-2011 01:26
مشكورين على اللقاء
واخص بالشكر ابو فهد وابوعادل


#31 Saudi Arabia [>> بنت الأديـــــب]
1.01/5 (28 صوت)

02-24-2011 09:03
شــكــر ع هــذا اللقــاء الــذي اعجــبــني ولا يــسعــنــي إلا ان اتــقــدم

بــعــبــارات بــســيــطة عــســى ان تــفــي بــما فــي قــلــبي لــهــذا

الشـــاعــر الكــبــيــر الاســتاذ :عــلــي بــن خــلــف الهــجــله

عــلمٌ وحِــــلمٌ واقــــتـدارٌ وفـطنـةٌ
بيـانٌ وشـعـرٌ فـي سمـا الـشعـرِ كـوكـبُ

مَــدَحتُكَ بالحــقِّ الــذي أنــتَ أهـلُــهُ
بـــكَ الحــقُّ يزهُـو والفصــاحـةُ تطـربُ


مع تحياتي وتقديري للاستاذ عبد العزيز ع جهوده المبذوله في هذا اللقاء الاكثر
من الرائع ونحن في انتظار جديدك


#32 Kuwait [العذوب الشمري]
1.01/5 (27 صوت)

02-25-2011 01:18
روعه روعه روعه
الله يعطيكم الف عافيه
ماكان ودي اللقاء يخلص
بس عاد الله يهداه شاعرنا بخل علينا بشعر الغزل
بس خفة دمه وروحه عوضت
يسلم اللي اجرى الحوار لا عدمناه


تقييم
1.01/10 (33 صوت)


Powered by Dimofinf cms Version 3.0.0
Copyright© Dimensions Of Information Inc.

الموقع الرسمي لقبيلة الهجال
(جميع المقالات تعبر عن وجهة نظر كاتبها)